Khwaab
===========================
Khwaab jo dekhe saare,
toote, bikhre bechaare,
andhiyaare me jo chamke,
ujaalon se wo haare,

Aankhen bhi tanha hain ab,
kahan gaye sapne wo sab,
aawara banjaare the jo,
laut kar aayenge ab kab,

Door ek vaadi bole,
gujre yahan se the wo,
hawa mita kar gayi,
kadamon ke nishaan the jo,

Kuchh aise gayab huye,
roothe ho jaise sabhi,
wo bhi chhor gaya,
sapna jo dekha abhi,

Aankhen yeh tanha meri,
hain kuchh thak si gayi,
aks dhundle huye,
palken kuchh bhaari hui,

Toote jo saare khwaab,
to bhala kya hua,
aankhen meri keh rahi,
dekhengi khwaab naya.